ترکمنستان: کمک‌های بشردوستانه ما به افغانستان ادامه می‌یابد

تلویزیون باغی: قربان‌قلی بیردی محمدوف، رییس جمهور ترکمنستان، می‌گوید که کشورش به ارایه کمک‌های بشردوستانه به افغانستان ادامه می‌دهد.

محمدوف در صحبت با خبرگزاری تاس گفته است که ترکمنستان به‌صورت منظم به افغانستان کمک می‌رساند و با ارایه کمک‌های بشردوستانه، مکاتب و شفاخانه‌ها را در مناطق روستایی می‌سازد و کارمندان محلی را آموزش می‌دهد.

او گفته است: «اخیراً تصمیم به ارسال محموله بشردوستانه دیگری به نشانه دوستی و همسایه‌گی خوب گرفته شده است. البته همه این‌ها با منابع خود ترکمنستان تامین می‌شود. ما قصد داریم این سنت خوب، زنده نگه داشته شود.»

رییس جمهور ترکمنستان گفته است که در آینده کمک‌های بشردوستانه به مردم افغانستان ارایه می‌شود و اطمینان دارد که صلح و توافق به‌زودی در افغانستان با توجه به گذشته تاریخی غنی این کشور، برقرار خواهد شد.

دولت طالبان که پس از فرار محمداشرف غنی شکل گرفت، تاکنون از سوی هیچ کشوری به رسمیت شناخته نشده است؛ اما شماری از کشورها اعلام آماده‌گی کرده‌اند که با حکومت سرپرست طالبان همکاری کنند.