دولت روسیه از تاجیکستان و طالبان خواست تنش‌ها را به صورت قابل قبول حل کنند

تلویزیون باغی: روسیه از تاجیکستان و طالبان خواسته است که تنش‌ها را به صورت قابل قبول برای هر دو طرف حل کنند. وزارت خارجه روسیه می‌گوید که براساس اطلاعات طالبان، ده‌ها هزار نیرو از واحدهای ویژه فقط در ولایت تخار و در مناطق مرزی جابه‌جا شده‌اند.

الکسی زایتسف، معاون مدیر اطلاعات و مطبوعات وزارت امور خارجه روسیه، گفته است که کابل و دوشنبه باید برای حل تنش‌ها در مرز افغانستان و تاجیکستان راه‌حل‌های قابل قبول را جست‌وجو کنند.

او افزوده است که مسکو با نگرانی، تنش‌ فزاینده‌ای را در روابط تاجیکستان و افغانستان و نیز اظهارات سرسختانه مقامات دو کشور مشاهده می‌کند. به گفته معاون سخنگوی وزارت خارجه روسیه، گزارش‌هایی وجود دارد که هر دو طرف، نیروهای مسلح را به مرز کشانده‌اند و باید دنبال جایگزین‌های قابل قبول برای هر دو جانب باشند.

امام‌علی رحمان، رییس جمهور تاجیکستان، بارها بر ایجاد دولت همه‌شمول در افغانستان تأکید کرده است. او هم‌چنان حمله طالبان را به پنجشیر محکوم کرده است.

در مقابل، طالبان نیز تاجیکستان را به دخالت در امور داخلی افغانستان متهم کرده‌ و نسبت به ادامه آن هشدار داده‌اند.