سبا د افغانستان د کرکټ ليګ (شپږيزه) سيالۍ پيلېږي

تمه ده چې په افغانستان کې د کرکټ ترټولو ستر کورنی ليګ (شپږيزه) سبا پيل شي.

د افغانستان کرکټ بورډ چارواکي وايي چې د دې مهمو او لويو سياليو لپاره هراړخيز چمتووالی نيول شوی دی.

شپږيزه کرکټ ليګ د افغانستان د کرکټ هغه لويې کورنۍ سيالۍ دي چې په کال کې يو ځل د کورنيو او بهرنيو لوبغاړو په ګډون سره په کابل کې ترسره کېږي.

دغه سياليو کې سږ کال ۸ لوبډلې شاملې دي چې د اتلولۍ جام د ګټلو لپاره به په خپلو منځونو کې سيالۍ کوي.

د يو شمېر راپورونو له مخې په سږ کال سياليو کې هم بهرني لوبغاړي شامل دي.

ويل کېږي له مېس عينک لوبډلې سره به د پاکستان دوه لوبغاړي افتخار احمد او مير حمزه، سپين غر لوبډلې سره پاکستانی آصف اپريدي او له عمان هېواد څخه به بلال خان د آمو لوبډلې سره لوبه وکړي.

کرکټ بورډ وايي د شپږیزې په اتم پړاو سیالیو کې د تېرو کلونو سره په توپیر د شپږو لوبډلو پر ځای اته لوبډلې لوبیږي.

دغه سيالۍ تېر کال د کرونا وبا له امله ترسره نشوې.