په غزه کې د اسراییلو د وحشي عملیاتو په پایله کې د وژل شویو فلسطینیانو ټولټال شمیر له 18,000 څخه اوښتی

باغی ټي وي رپورټ
واشنګټن: په غزه کې د اسراییلو د وحشي عملیاتو په پایله کې د وژل شویو فلسطینیانو ټولټال شمیر له 18,000 څخه اوښتی دی او د امریکا ولسمشر جوبایډن د اسراییلو د نه متقابل ملاتړ د دوام هوډ څرګند کړی دی.

د امریکا ولسمشر په سپینه ماڼۍ کې په روانو مراسمو کې وویل چې د حماس تر له منځه وړلو پورې به له اسراییلو سره پوځي مرستې جاري ساتي.

هغه وویل چې دا باید په پام کې ونیول شي چې د نړۍ عامه افکار په شپه کې بدلیدلی شي.
په همدې حال کې د امریکا ولسمشر د اسرایلو له صدراعظم نتنیاهو سره خپلو ټینګو اړیکو ته هم اشاره وکړه.

د امریکا د بهرنیو چارو وزارت ویاند: د غزې د جګړې یوازینۍ حل لاره پوځي حل دی

له بلې خوا د امریکا د بهرنیو چارو د وزارت ویاند متیو میلر ویلي دي چې هغه اوربند چې په غزه کې د حماس مشرتابه ژوندی پریږدي د منلو وړ نه وي او د غزې د جګړې یوازینۍ حل لاره پوځي حل دی.

هغه وویل، “موږ باور لرو چې د حماس د مشرتابه د له منځه وړلو لپاره یوازې پوځي حل لاره کېدای شي، چې د اکتوبر د اوومې حملې یې پلان کړې وې. په نهایت کې، د اسراییلو او فلسطینیانو ترمنځ پراخه شخړه له پوځي لارې نه شي حل کېدای.”