دکتور اسامه عزیز د کابل پوهنتون رئیس وټاکل شو

د لوړو زده کړو وزارت دکتور اسامه عزیز د کابل پوهنتون د نوي رئیس په توګه ټاکلی دی.

لوړو زده کړو وزارت یوې سرچېنې نن ټکی اسیا ته وویل چې دکتور اسامه عزیز به نن-سبا کې کابل ریاست ته معرفي شي.

دکتور اسامه عزیز د ننګرهار ولایت اوسیدونکی دی او د اسلام اباد نړیوال اسلامي پوهنتون د شرعیاتو او قانون له پوهنځي يې لسانس کړی دی. هغه د همدې پوهنتون څخه په اسلامي تجارتي قوانینو کې ماستري او په فقه و قانون کې دکتورا کړې ده.

ښاغلی اسامه څو کاله په اسلام اباد نړیوال اسلامي پوهنتون سربېره ‎د الفجر انستیتوت په حقوقو پوهنځي کې هم استادي کړې ده.

تر دې وړاندې محمد اشرف غیرت د کابل پوهنتون سرپرست رئیس و.