۱۴۳ پیلوت ارتش افغانستان در تاجیکستان بازداشت شدند

تلویزیون باغی: روزنامه امریکایی نیویارک تایمز گزارش داده که ۱۴۳ پیلوت و کمک پیلوتان نیروهای هوایی ارتش دولت سابق افغانستان از ماه‌ها به این سو در تاجیکستان زندانی اند.

بر بنیاد گزارش این رسانه، این شمار از خلبانان و خدمه هواپیمای ارتش سابق افغانستان پس از سقوط این کشور به دست طالبان راهی تاجیکستان شدند و در آنجا توسط نظامیان تاجیکستان بازداشت و زندانی شدند.

یکی از خلبانان بازداشت شده به نیوریارک تایمز گفت: «ما به ارتش و دولت امریکا اعتماد داشتیم که به ما کمک می‌کنند و ما را از این وضعیت خارج می‌کنند.»

با این حال وزارت امور خارجه امریکا خاطرنشان کرده که با حکومت تاجیکستان برای خروج خلبانان نیروهای ارتش پیشین افغانستان مطابق جدول تعیین شده، ارتباط منظم دارد.

با سقوط دولت افغانستان به دست طالبان ده‌ها خلبان ارتش افغانستان با هواپیماهای شان راهی تاجیکستان شدند و این نخستین گزارش است که از بازداشت آنان توسط دولت تاجیکستان خبر می‌دهد.

او هم‌چنان به این رسانه گفته است که در حال حاضر چندین هزار خلبان و خدمه هواپیما و کارکنان نیروهای هوایی دیگر افغانستان پنهان شده‌اند و احساس می‌کنند توسط ارتش امریکا، رها شده‌اند. به گفته او اکنون این خلبان‌ها و کارکنان هوایی و خانواده‌های‌شان با خطر جدی مواجه‌اند.

یک عضو نیروهای هوایی ارتش سابق افغانستان هم به این رسانه گفته است که پنج سال با نیروهای امریکایی کار کرده و در حال حاضر او و همکارانش از سوی این کشور فراموش شده‌اند.