چین او پاکستان وايي چې ژر دې افغانستان ته بشري مرستې واستول شي

چین او پاکستان وايي چې ژر دې افغانستان ته بشري مرستې واستول شي

دوی دغه راز ټینګار کړی دی چې له اقتصادي بحرانه د افغانستان د وتلو لپاره په کار ده چې امریکا د افغانستان کنګل شوې مالي پانګه هم ژر ازاده کړي. د یادونې ده چې واک ته د ا.ا تر رسېدو وروسته د افغانستان شاوخوا نهه میلیار ډالري پانګه کنګل شوې ده او دې چارې افغانستان له سخت اقتصادي وضعیت سره مخ کړی دی.

(2021 / 10 / 26 نېټه باغي ټلویزیون)

بشپړ راپور

چین او پاکستان پر نړیوالې ټولنې غږ کړی دی چې د ژمې تر یخنۍ مخکې دې افغانستان ته بشري مرستې واستوي. د اسوشیټډ پرس اژانس د راپور له مخې، د پاکستان لومړي وزیر عمران خان د چین له ولسمشر شي جین پینګ سره ټلفوني خبرې کړې دي.

راپور کاږي چې په دې ټلفوني خبرو کې دواړو لوریو د نورو موضوعاتو سربېره د افغانستان پر وضعیت هم خبرې اترې کړې دي. راپور کې راغلي چې په دې ټلفوني مکالمه کې دواړو لوریو له نړیوالې ټولنې غوښتي چې په افغانستان کې د یو ستر بشري ناورین مخنیوي لپاره ژر تر ژره دغه هېواد ته بشري مرستې ولېږي.